Árleg söfnun fermingarbarna fyrir Hjálparstarf kirkjunnar fór fram í Fossvogsprestakalli í gær, miðvikudaginn 4. nóvember. Fermingarbörnin gengu hús úr húsi, tvö eða fleiri saman í hópum, með bauka frá Hjálparstarfi kirkjunnar, og buðu fólki að styðja við starf Hjálparstarfsins með fjárframlagi. Góð þátttaka var hjá fermingarbörnum í Bústaðakirkju og Grensáskirkju, sem stóðu sig prýðilega á söfnunardeginum. Við þökkum fermingarbörnunum þátttökuna og einnig öllum sem lögðu Hjálparstarfi kirkjunnar lið og tóku vel á móti fermingarbörnunum. 

Myndlistarsýning Önnu Eyjólfsdóttur myndlistarkonu stendur yfir í safnaðarheimili Grensáskirkju. Kirkjan er opin mánudaga til fimmtudaga kl. 10-15 og um helgar, í tengslum við helgihald kirkjunnar. Sýningin mun standa til fimmtudagsins 26. nóvember nk. Verið hjartanlega velkomin á myndlistarsýningu Önnu Eyjólfsdóttur í Grensáskirkju. 

Séra Benedikt Sigurðsson prestur í Garðabæ var gestur dagsins í eldri borgarastarfinu í Bústaðakirkju í gær. Benni Sig, eins og hann er gjarnan kallaður lék á harmonikku og leiddi söng, á sinn einstaka og hlýlega máta. Sungnir voru sálmar og falleg dægurlög, boðskapurinn vonarríkur og kærleiksríkur. Séra Sólveig Franklínsdóttir leiddi dagskrána í eldri borgarastarfinu í fjarveru Hólmfríðar Ólafsdóttur djákna. Við þökkum Benna Sig innilega fyrir komuna í eldri borgarastarfið í Bústaðakirkju. 

Örn Árnason leikari og skemmtikraftur og Jónas Þórir organisti fylltu Bústaðakirkju á síðustu hádegistónleikunum í Bleikum október, að þessu sinni. Þeir fluttu vel valdar revíur og gamanmál. Séra Sigríður Kristín Helgadóttir annaðist um kynningu og bænastund í lok tónleikanna. Bleikur október í Bústaðakirkju var afskaplega vel sóttur, þetta árið. Við þökkum öllu listafólkinu framlag sitt til Bleiks október og tónleikagestum fyrir komuna. Verið hjartanlega velkomin í Bústaðakirkju. 

Fræðsla um sorg og missi fór fram með fermingarbörnum og foreldrum þriðjudagskvöldið 20. október sl. Séra Sigríður Kristín Helgadóttir prestur í Bústaðakirkju og Grensáskirkju leiddi stundina. Við þökkum góða þátttöku fermingarbarna og foreldra á fræðslukvöldi um sorg og viðbrögð við missi. 

Stórkostlegir óperutónar voru á dagskrá í Bleikum október í Bústaðakirkju í gær, miðvikudaginn 21. október kl. 12:05. Þá fóru fram hádegistónleikar í Bleikum október í Bústaðakirkju þar sem Íris Björk Gunnarsdóttir og Herdís Anna Jónasdóttir sungu og með þeim lék á flygil Matthildur Anna Gísladóttir. Bjarni Snæbjörnsson leikstjóri kynnti óperuna 27, sem frumflutt verður í Borgarleikhúsinu í lok mánaðarins. Við þökkum listafólkinu sitt dýrmæta framlag og öllum fyrir komuna. Hlökkum til að sjá ykkur aftur í Bústaðakirkju. 

Sóli Hólm sló í gegn í Bleikum október í Bústaðakirkju. Tónleikagestir veltust um að hlátri. Sóli er stórkostleg eftirherma og grínisti og brá sér í líki Gylfa Ægissonar, Páls Óskars Hjálmtýssonar, Pálma Gunnarssonar og fleiri þjóðþekktra einstaklinga. Jónas Þórir lék á flygil. Hátt í 200 tónleikagestir mættu á hádegistónleikana með Sóla Hólm og Jónasi Þóri miðvikudaginn 14. október kl. 12:05. Dagskráin er litrík framundan. Verið hjartanlega velkomin til þátttöku í Bleikum október í Bústaðakirkju. 

Bleikur október í Bústaðakirkju fer vel af stað þetta árið. Jónas Þórir ásamt hljómsveit riðu á vaðið á fyrstu hádegistónleikum mánaðarins, miðvikudaginn 7. október sl., með sálmajassi. Með Jónasi Þóri var hljómveit, þar sem Gunnar Hrafnsson lék á bassa, Einar Valur Scheving á trommur og Sigurður Flosason á saxafón. Við þökkum tónlistarsmönnunum framlag sitt til þessa góða málefnis og fyrir stórskemmtilega tónleika. Verið hjartanlega velkomin til dagskrárinnar í Bleikum október í Bústaðakirkju. 

Fermingarbörnin í Bústaðakirkju og Grensáskirkju fengu Nýja testamentið að gjöf í fermingarfræðslutímanum í liðinni viku. Félagsmenn í félaginu Orðið, félagi um útbreiðslu Guðs orðs, komu færandi hendi og afhentu hverju og einu fermingarbarni testamentið að gjöf. Samhliða hvöttu prestarnir börnin og fjölskyldurnar til að lesa Nýja testamentið. Hjálpumst að við að rækta heilbirgða trú með lestri á textum Biblíunnar. Heilbrigð trú einkennist af kærleika og virðingu, umhyggju og upprisu. 

Kirkjukór Grensáskirkju auglýsir eftir nýju söngfólki í allar raddir. Æfingar fara fram í Grensáskirkju á mánudögum kl. 17:30-19:00. Opnar æfingar verða í október kl. 17:00 þar sem hægt er að mæta, kynnast þeim sem fyrir eru og syngja saman. Öll eru velkomin, með eða án tónlistarmenntunar. Nánari upplýsingar veitir Ásta Haraldsdóttir organisti. Viltu koma og syngja í kór? Vertu hjartanlega velkomin(n)!

Vinavoðir eru hópur sem hittist á fimmtudögum í kirkjunni og prjóna til góðs. Þetta eru treflar og sjöl sem beðið hefur verið fyrir og ætlað sem faðmlag frá söfnuðunum báðum, Grensáskirkju og Bústaðakirkju. Með hverri vinavoð fylgir bæn og vatnslituð mynd. Fallegt verkefni sem vert er að taka þátt í. Vinavoðirnar eru á fimmtudögum í Grensáskirkju frá 12-14. Verið hjartanlega velkomin.

Krakkasálmarnir í Grensáskirkju hófust í dag, sunnudaginn 27. september kl. 11:00. Um er að ræða barnastarf á sunnudögum í safnaðarheimili Grensáskirkju á sama tíma og messan fer fram. Krakkasálmarnir eru nýjung í starfi Fossvogsprestakalls þar sem séra Laufey Brá Jónsdóttir og leiðtogarnir úr æskulýðsstarfinu hafa skapað glænýja umgjörð um boðskapinn mikilvæga, sem ætlaður er börnum á öllum aldri. Fjölmennum næsta sunnudag í messu og krakkasálma í Grensáskirkju.