Vinavoðir eru hópur sem hittist á fimmtudögum í kirkjunni og prjóna til góðs. Þetta eru treflar og sjöl sem beðið hefur verið fyrir og ætlað sem faðmlag frá söfnuðunum báðum, Grensáskirkju og Bústaðakirkju. Með hverri vinavoð fylgir bæn og vatnslituð mynd. Fallegt verkefni sem vert er að taka þátt í. Vinavoðirnar eru á fimmtudögum í Grensáskirkju frá 12-14. Verið hjartanlega velkomin.

Krakkasálmarnir í Grensáskirkju hófust í dag, sunnudaginn 27. september kl. 11:00. Um er að ræða barnastarf á sunnudögum í safnaðarheimili Grensáskirkju á sama tíma og messan fer fram. Krakkasálmarnir eru nýjung í starfi Fossvogsprestakalls þar sem séra Laufey Brá Jónsdóttir og leiðtogarnir úr æskulýðsstarfinu hafa skapað glænýja umgjörð um boðskapinn mikilvæga, sem ætlaður er börnum á öllum aldri. Fjölmennum næsta sunnudag í messu og krakkasálma í Grensáskirkju. 

Bleikur október í Bústaðakirkju verður á sínum stað. Yfirskriftin þetta árið er Lífið er fegurð og gleði. Dagskráin samanstendur af hádegistónleikum í Bústaðakirkju alla miðvikudaga í október kl. 12:05. Ókeypis er inn á tónleikana en tónleikagestum gefst færi á að styðja Ljósið með fjárframlögum. Í kjölfar tónleikanna verður boðið upp á léttar veitingar í safnaðarheimili Bústaðakirkju, gegn vægu gjaldi. Verið hjartanlega velkomin á Bleikan október í Bústaðakirkju. 

Fyrirbænastundir, barnamessur, foreldramorgnar, eldriborgarastarfið, prjónasamverur, vinavoðir, karlakaffi, æskulýðsfélagið, Vinir í bata, kyrrðarbæn, Alfa námskeið, starf Kvenfélagsins, krílasálmar, kirkjuprakkarar, TTT, fermingarfræðsla, messuhópastarf, tónleikar og hið hefðbundna sunnudagshelgihald, og svo allt hitt, eins og sjá má á myndinni hér til hliðar. Verið hjartanlega velkomin til þátttöku í kirkjustarfinu. 

Kyrrðarbænastund fer fram í kapellunni í Grensáskirkju alla fimmtudaga kl. 18:15. Kyrrðarbæn er bænaseta í þögn með ákveðinni aðferð þar sem nærvera og verkun Guðs er samþykkt með bænarorði. 

Séra Bára Friðriksdóttir, Ingunn Björnsdóttir og Sigurbjörg Þorgímsdóttir leiða kyrrðarbænastundirnar í Grensáskirkju. 

Verið hjartanlega velkomin. 

Í Bústaðakirkju starfa nokkrir hópar messuþjóna. Messuþjónarnir annast um ýmiskonar þjónustu í helgihaldi kirkjunnar, svo sem lestur ritningarlestra, móttöku á kirkjugestum, umsjón með kirkjukaffi, uppröðun á sálmanúmerum og fleiru. Þriðjudaginn 1. september nk. kl. 16:30 verður haldinn kynningarfundur varðandi störf messuþjóna í Bústaðakirkju og nýir þátttakendur sérstaklega boðnir velkomnir. Áhugasamir eru hjartanlega velkomnir. 

Grensássöfnuður gaf Hallgrímskirkju í Saurbæ orgel. Gjöfinni var fylgt úr hlaði með safnaðarferð að lokinni messu í Grensáskirkju sunnudaginn 16. ágúst sl. Sameiginleg messa fór fram í Hallgrímskirkju að þessu tilefni, sunnudaginn 16. ágúst kl. 14. Við þökkum hlýjar móttökur í Hallgrímskirkju og einnig öllum sem tóku þátt í safnaðarferðinni innilega fyrir samveruna á þessum viðburðarríka degi. 

Biskup Íslands kynnti fyrir skömmu samstarf þjóðkirkjunnar og Minningarsjóðs Ólafar Töru. Á grundvelli þess samstarfs býðs baráttufólki gegn kynbundnu ofbeldi nú sérstök sálgæsla og handleiðsla hjá séra Laufeyju Brá Jónsdóttur presti í Fossvogsprestakalli. Í Fossvogsprestakalli fögnum við þessu frumkvæði biskups og einnig því að Fossvogsprestakall skuli vera vettvangur framkvæmdarinnar og að séra Laufeyju Brá Jónsdóttur skuli hafa verið falið þetta ábyrgðarhlutverk.

Messufrí verður að venju í Grensáskirkju síðustu tvo sunnudaga júlímánaðar og sunnudaginn í Verslunarmannahelgi. Næsta messa í Grensáskirkju verður því sunnudaginn 9. ágúst nk., en þá mun séra Laufey Brá Jónsdóttir þjóna fyrir altari, ásamt messuþjónum. Í Fossvogsprestakalli fer helgihaldið fram með kvöldmessum í Bústaðakirkju næstu tvo sunnudaga kl. 20. Messufrí er í báðum kirkjum um Verslunarmannahelgina.Góður Guð veiti ykkur sína blessun og náð og gefi gæfuríkt og gjöfult sumar. 

Fermingarfræðsla vetrarins í Fossvogsprestakalli hefst með haustnámskeiði sem fram fer í Bústaðakirkju og Grensáskirkju dagana 19.-21. ágúst nk. kl. 9-12. Miðvikudaignn 19. ágúst mæta fermingarbörnin í sína kirkju, þ.e. þá kirkju sem þau munu sækja fermingarfræðslu í, Bústaðakirkju eða Grensáskirkju. Fimmtudaginn 20. ágúst verður hópurinn allur saman í Grensáskirkju og föstudaginn 21. ágúst söfnumst við öll saman í Bústaðakirkju. Sunnudaginn 23. ágúst verða síðan upplýsingafundir fyrir fermingarbörn og foreldra að lokinni messu í báðum kirkjum, Grensáskirkju kl. 11 og Bústaðakirkju kl. 20. Verið hjartanlega velkomin til þátttöku í fermingarfræðslu. 

Sumarnámskeið fer fram í Grensáskirkju þessar vikurnar. Góð þátttaka er á námskeiðunum og dagskráin fjölbreytt. Sólveig Franklínsdóttir æskulýðsfulltrúi hefur veg og vanda að dagskránni, ásamt leiðtogum sínum. Veðrið lék við börnin í liðinni viku og fór hópurinn meðal annars í vettvangsferð í Elliðaárdalinn, eins og sést hér á myndunum.