Grensáskirkja býður upp á sumarnámskeið fyrir börn vikurnar 10.-13. júní og 16.-20. júní nk. Námskeiðin eru ætluð börnum á aldrinum 6-9 ára. Dagskráin mun fara fram í kirkjunni, safnaðarheimilinu, sem og í nærumhverfi kirkjunnar. Umsjón með starfinu hefur Sólveig Franklínsdóttir, æskulýðsfulltrúi. Verið hjartanlega velkomin á sumarnámskeið í Grensáskirkju. 

Kirkjur Fossvogsprestakalls iða af lífi, bæði Bústaðakirkja og Grensáskirkja. Kórar halda tónleika. Til dæmis hélt Kór Skaftfellinga tónleika í Grensáskirkju í maí. Myndin sem fylgir þessarsi umfjöllun er einmitt frá þeim tónleikum. Bústaðakirkja og Grensáskirkja vilja vera sem opinn faðmur fyrir sóknarbörnin og alla sem hingað vilja leita. Yfir sumartímann fer reglulegt sunnudagshelgihald fram kl. 20 í Bústaðakirkju og kl. 11 í Grensáskirkju. Verið hjartanlega velkomin.

Fyrsta kvöldmessan í Bústaðakirkju, þetta sumarið fer fram sunnudaginn 18. maí nk. kl. 20. Edda Austmann Harðardóttir mezzósópran og Antonía Hevesí píanóleikari annast um tónlistina. Séra Sigríður Kristín Helgadóttir flytur hugvekju og þjónar fyrir altari, ásamt messuþjónum. Verið hjartanlega velkomin í kvöldmessu í Bústaðakirkju. 

Fermingarfræðsla í Fossvogsprestakalli, Bústaðakirkju og Grensáskirkju, hefst með námskeiði eftir miðjan ágúst. Skráning fer fram hér á vefnum og er mikilvægt að foreldrar og forráðamenn fylli skráningarformið vel út, skrái þar rétt netföng og heimilisföng því samskiptin í framhaldinu fara heilmikið fram í gegnum tölvupóst. Við hvetjum ykkur til að kynna ykkur málið. Verið hjartanlega velkomin í fermingarstörfin í Fossvogsprestakalli. 

Eva Sól Andrésdóttir og Gréta Petrína Zimsen voru útskrifaðar úr Leiðtogaskóla þjóðkirkjunnar við hátíðlega athöfn í Grensáskirkju, sunnudaginn 4. maí sl. Sr. Laufey Brá Jónsdóttir þjónaði fyrir altari. Sólveig Franklínsdóttir, æskulýðsfulltrúi Fossvogsprestakalls afhenti þeim útskriftarskjölin fyrir hönd Leiðtogaskólans. Við óskum Evu Sól og Grétu Petrínu innilega til hamingju með útskriftina. Guð verndi þær í lífi og starfi.

Listaverk leikskólabarna frá leikskólum hverfisins prýða anddyri Bústaðakirkju þessa dagana. Sýningin var opnuð í dag, á Sumardaginn fyrsta. Þá fór fram í Bústaðakirkju stutt samvera áður en gengið var fylktu liði í skrúðgöngu niður í Vík. Skólahljómsveit Austurbæjar spilaði nokkur vel valin lög, Antonía Hevesí lék á píanó með Fanný Lísu Hevesí, sem söng tvö sumarleg lög. Hjalti Guðmundsson formaður nemendafélags Réttarholtsskóla flutti ávarp. Við þökkum fyrir samveruna í Bústaðakirkju í dag. Gleðilegt sumar. 

Helgihald um dymbilviku og páska var ágætlega sótt í Fossvogsprestakalli. Við nutum einsöngs og samsöngs, kórsöngs og samveru. Á Páskadagsmorgni var síðan boðið til morgunverðar að loknum hátíðarguðsþjónustum í báðum kirkjum. Við þökkum öllum þátttöku í helgihaldi dymbilviku og páska. Megi upprisusól páskanna lýsa upp tilveru ykkar. Verið hjartanlega velkomin í Bústaðakirkju og Grensáskirkju. 

Dagskrá Fossvogsprestakalls, Bústaðakirkju og Grensáskirkju, í dymbilviku og á páskum er rík og litskrúðug. Hefðbundnir dagskrárliðir eru í báðum kirkjum alla helgidagana um hátíðarnar. Nýjung í helgihaldi er einnig á dagskrá um þessa páska. Guðsþjónusta undir berum himni fer fram við sólarupprás á páskadag um kl. 05:30. Stundin fer fram sunnan við Fossvogskirkju. Nánari upplýsingar um dagskrá prestakallsins má finna á auglýsingunni. Verið hjartanlega velkomin til helgihalds í dymbilviku og á páskum. 

Fermingar eru að hefjast í Fossvogsprestakalli. Fermingarathafnirnar eru hátíðarstundir í söfnuðum kirkjunnar. Í Fossvogsprestakalli er aðbúnaður svo ríkur að ekki hefur þurft að takmarka fjölda þeirra sem fylgja hverju fermingarbarni, kirkjurnar báðar eru það rúmgóðar. Allir eru því hjartanlega velkomnir til helgihaldsins. Við biðjum börnunum öllum blessunar á fermingardegi og til framtíðar. Biðjum fyrir þeim og fjölskyldum þeirra, að allt verði þeim til góðs og heilla. 

Unga fólkið verður í fyrirrúmi í helgihaldi sunnudagsins í Bústaðakirkju og Grensáskirkju. Motown stemning og kór FÍH í Bústaðakirkju kl. 13, flæðimessa og uppskeruhátíð í Grensáskirkju kl. 11. Barnamessan verður á sínum stað í Bústaðakirkju kl. 11. Verið hjartanlega velkomin. 

Útvarpsmessa dagsins í Ríkisútvarpinu á Rás eitt, sunnudaginn 23. mars nk. kl. 11:00 verður frá Grensáskirkju. Upptaka fór fram fimmtudaginn 20. mars. Það er bæn okkar í Grensáskirkju að útsending helgihaldsins megi verða öllum þeim sem hlusta, vettvangur andlegrar næringar, friðar og bænar. Við þökkum öllum innilega fyrir þátttökuna í upptökunni og biðjum öllum sem á hlýða blessunar og friðar. 

Séra Laufey Brá Jónsdóttir og séra Sigríður Kristín Helgadóttir hafa verið ráðnar til starfa í Fossvogsprestakalli. Sjö umsóknir bárust um stöðurnar tvær. Við fögnum ráðningu þeirra og bjóðum þær hjartanlega velkomnar til starfa.