Eldri borgarastarfið í Bústaðakirkju er blómlegt og dagskráin fjölbreytt þetta misserið. Hólmfríður Ólafsdóttir djákni sér um skipulagningu og framkvæmd, í samstarfi við Andreu Þóru Ásgeirsdóttur kirkjuvörð og fleiri. Miðvikudaginn 12. febrúar sl. kom séra Vigfús Bjarni Albertsson í heimsókn. Hann las úr nýrri bók sinni Hver vegur að heiman er vegur heim, sem Skálholtsútgáfan gaf út fyrir jólin. Við þökkum ykkur öllum fyrir samveruna. 

Ástin og lífið voru á dagskrá í Bústaðakirkju í febrúar. Fyrirlestrar voru haldnir um ýmis þemu ástarinnar. Yfirskriftin var Ástin og lífið í Bústaðakirkju. Febrúar í tali, tónum og ljóðum. Við þökkum öllum sem tóku þátt í dagskránni með okkur. Verið hjartanlega velkomin í Bústaðakirkju. 

Kirkjuprakkarar og TTT eru að hefjast að nýju. Skráning stendur yfir og verða fyrstu samverurnar þriðjudaginn 18. febrúar nk. Yfirskriftin að þessu sinni er Biblíusögur með leik og LEGO. Við munum lesa nokkrar Biblíusögur og tengja boðskap þeirra við nútímann. Við munum bæði leika þærmeð léttum leikmunum og byggja þær með LEGO kubbum. Verið hjartanlega velkomin í barna- og æskulýðsstarfið í Fossvogsprestakalli. 

Stóri kótilettudagurinn fór fram í Bústaðakirkju miðvikudaginn 5. febrúar sl. kl. 12:00. Hólmfríður Ólafsdóttir djákni og Andrea Þóra Ásgeirsdóttir kirkjuvörður höfðu veg og vanda að skipulagningu og framkvæmd dagskrárinnar. Glatt var yfir öllum þrátt fyrir að rauðar viðvaranir væru handan hornsins. Við þökkum öllum þátttökuna og minnum á eldri borgarastarfið sem fram fer í Bústaðakirkju alla miðvikudaga í vetur. 

Ástin verður á dagskrá í Bústaðakirkju í febrúar. Boðið verður upp á fjölbreytta fyrirlestra og samverur þrjú kvöld í tengslum við Valentínusardaginn, sem hafa ástina og kærleikann að leiðarljósi. Laugadaginn 15. febrúar verður síðan boðið upp á orgelleik og prestsþjónustu við hjónavígslur öllum að kostnaðarlausu. Ástarmessa verður síðan á dagskrá sunnudaginn 16. febrúar kl. 13. Kynnið ykkur dagskrána, sjá plakatið, og verið hjartanlega velkomin í Bústaðakirkju. 

Biskup Íslands hefur nú auglýst eftir tveimur prestum til starfa í Fossvogsprestakalli. Reiknað er með að nýir prestar taki til starfa eigi síðar en 1. maí nk. Nánari upplýsingar má finna hér. 

Það er tilhlökkunarefni að fá nýja presta til starfa við Bústaðakirkju og Grensáskirkju. 

Á liðnu hausti vorum við svo lánsöm að fá til liðs við okkur í barnamessurnar í Bústaðakirkju þau Karen, Sólveigu og Arnar. Öll hafa þau gríðarmikla reynslu af leiðtogastörfum á vettvangi kirkju, íþrótta og KFUM&KFUK. Í vetur hafa þau skipt með sér að leiða barnamessurnar í Bústaðakirkju, ásamt prestum og organistum. Síðan má sjá styrkleikana í sameinuðu prestakalli í því aukna samstarfi sem sjá má milli organista prestakallsins. 

Fyrirbænastundir fara fram í Grensáskirkju í hádeginu alla þriðjudaga. Stundin hefst á orgelleik kl. 12 og tíu mínútum síðar hefst bænastundin sjálf. Eftir ritningarlestur, bænir og fyrirbænir er svo aftur leikið á orgel. Öllum viðstöddum er boðið upp á léttar veitingar í safnaðarheimilinu að athöfn lokinni. Verið hjartanlega velkomin í bænastund í Grensáskirkju.

Stóri kótilettudagurinn fer fram í Bústaðakirkju miðvikudaginn 5. febrúar nk. Húsið opnar klukkan 12:00 og matur hefst kl. 12:30. Örn Árnason syngur og segir sögur. Jónas Þórir leikur á píanó. Bókið sem fyrst þar sem fjöldi gesta er takmarkaður. Verið hjartanlega velkomin á stóra kótilettudaginn í Bústaðakirkju. 

Bústaðakirkja og Tónskólinn í Reykjavík eiga með sér farsælt samstarf. Við fögnum því góða samstarfi.

Stórskemmtileg stemmning var í troðfullri Bústaðakirkju á fyrsta sunnudegi á nýju ári, 5. janúar sl. kl. 11. Frímúrarastúkan Glitnir fagnaði 50 ára afmæli með þátttöku í guðsþjónustu dagsins. Séra Sigríður Kristín Helgadóttir þjónaði fyrir altari ásamt messuþjónum. Séra Örn Bárður Jónsson prédikaði. Við þökkum öllum þátttökuna í helgihaldinu og hátíðinni. Verið hjartanlega velkomin í Bústaðakirkju. 

Grensáskirkja var þéttsetin í kveðjumessu séra Maríu G. Ágústsdóttur fráfarandi sóknarprests Fossvogsprestakalls og séra Daníels Ágústs Gautasonar fráfarandi æskulýðsprests, sem haldin var sunnudaginn 5. júní 2025 kl. 11:00. Í lok guðsþjónustunnar flutti Erik Pálsson formaður sóknarnefndar Grensáskirkju ávarp. Við þökkum öllum sem komu til kirkju á þessum tímamótum.