Aðventuhátíð Bústaðakirkju fer fram fyrsta sunnudag í aðventu, 30. nóvember nk. kl. 17:00. Forseti Íslands, Halla Tómasdóttir, mun flytja hátíðarávarp. Barnakór Fossvogs syngur og Kammerkór Bústaðakirkju. Jónas Þórir leiðir hljómsveit, einsöngvara, dúó, tríó og barnakór. Verið hjartanlega velkomin á aðventuhátíð Bústaðakirkju. 

Fulltrúar Bústaðakirkju og Kvenfélags Bústaðasóknar heimsóttu Ljósið, endurhæfingarmiðstöð fyrir krabbameinsgreinda, föstudaginn 14. nóvember sl. Þar afhentu fulltrúar safnaðarins og kvenfélagsins, Ernu Magnúsdóttur framkvæmdastjóra Ljóssins fjárframlag sem var afrakstur Bleiks október í Bústaðakirkju. Andrea Þóra Ásgeirsdóttir, kirkjuhaldari, afhenti Ernu staðfestingu þessa, eins og sést á myndinni. 

Mánudaginn 24. nóvember var líf og fjör í Grensáskirkju, eins og reyndar marga aðra daga. Þann mánudaginn komu hátt í 500 manns í kirkjuna. Fyrst var þar fjölmenn útför og svo hélt kirkjukór Grensáskirkju sína vikulegu æfingu. Að henni lokinni fóru fram tónleikar Suzuki tónlistarskólans. Hjálparstarf kirkjunnar hélt fund um vonina og síðan fór fram æfing Óperukórsins um kvöldið. Svona eru dagarnir stundum í kirkjum Fossvogsprestakalls. Við þökkum fyrir samveruna í Grensáskirkju.

Bleikur október í Bústaðakirkju var haldinn í fimmtánda skipti nú í ár. Jónas Þórir organisti hafði veg og vanda að dagskránni eins og áður. Hádegistónleikar fóru fram alla miðvikudagana í október. Aðgangur á hádegistónleikana var ókeypis en tónleikagestum var boðið að styðja Ljósið, endurhæfingarmiðstöð fyrir krabbameinsgreinda og kaupa bleiku slaufu Krabbameinsfélagsins. Samtals skilaði Bleikur október Ljósinu og Krabbameinsfélaginu yfir kr. 1.400.000.- Við þökkum tónlistarfólkinu dýrmætt framlag sitt og öllum tónleikagestum samveruna, þátttökuna og fjárframlögin, sem fara í góð málefni. 

Þriðja bókin í þríleiknum VONIN akkeri fyrir sálina, KÆRLEIKURINN fellur aldrei úr gildi og TRÚIN flytur fjöll, er komin út. Allar innihalda þær safn af gömlum og nýjum tilvitnunum um trú, von og kærleika. Höfundur bókarinnar er séra Þorvaldur Víðisson og útgefandi er Kirkjuhúsið-Skálholtsútgáfan, sem er til húsa á fyrstu hæðinni í Bústaðakirkju. 

Fermingarbörnin í Bústaðakirkju og Grensáskirkju munu ganga í hús fimmtudaginn 6. nóvember nk. og safna fé fyrir Hjálparstarf kirkjunnar. Söfnunin mun fara fram á milli kl. 17-20. Um er að ræða árlega söfnun fermingarbarna á landinu öllu til stuðning vatnsverkefnum Hjálparstarfs kirkjunnar í Eþíópíu. Við biðjum alla góðfúslega að taka vel á móti fermingarbörnunum og styðja vel við bakið á mikilvægu og faglegu starfi Hjálparstarfs kirkjunnar. 

Hrekkjavakan var sýnileg í Grensáskirkju í liðinni viku. Þar mátti sjá beinagrindur, drauga, köngulær og annan óhugnað. Umgjörð barna- og æskulýðsstarfsins var því heldur óhugguleg þá vikuna, eins og myndirnar bera með sér. Séra Guðný Hallgrímsdóttir, sérþjónustuprestur, átti heiðurinn af skreytingunum öllum. Hrekkjavökuhátíð var haldin í æskulýðsstarfi fatlaðra. Skreytingarnar vöktu mikla lukku í Grensáskirkju.

Fyrirbænastund fer fram í Grensáskirkju í hádeginu alla þriðjudaga kl. 12:00. Stundin hefst á því að Ásta Haraldsdóttur organisti leikur tónlist. Þá leiða prestarnir fyrirbænastundina frá kl. 12:10, þar sem hægt er að óska eftir því að beðið sé sérstaklega fyrir einstaklingum eða tilteknum málefnum. Stundinni lýkur fyrir kl. 12:30, en þá er boðið upp á léttan hádegisverð í safnaðarheimili kirkjunnar, gegn vægu gjaldi. Verið hjartanlega velkomin. 

Hádegistónleikar Alto sem vera áttu í Bústaðakirkju miðvikudaginn 29. október nk. falla niður vegna veðurs. Tónleikarnir hefðu verið síðasti dagskrárliðurinn í Bleikum október í Bústaðakirkju að þessu sinni. Verið hjartanlega velkomin til helgihalds og annarrar dagskrár Bústaðakirkju. 

Í kvöld áttu fermingarbörn og forráðamenn úr Grensássókn og Bústaðasókn saman dýrmæta stund í Bústaðakirkju með prestunum sínum og æskulýðsfulltrúa.
Séra Sigríður Kristín Helgadóttir ræddi um sorg og sorgarviðbrögð af mikilli þekkingu, næmni og nærgætni.
Ketill Ágússon lék á flygil og gítar og flutti frumsamið lag sem hann tileinkaði ömmu sinni sem er fallin frá.

Það ríkti hlý og notaleg stemning í kirkjunni þar sem samvera, samkennd og tónlist runnu saman í dýrmæta kvöldstund.

Bjarni Arason og hljómsveit fylltu Bústaðakirkju á hádegistónleikum miðvikudaginn 22. október sl. Bjarni Sveinbjörnsson lék á bassa, Matthías Stefánsson á fiðlu og gítar og Jónas Þórir á flygil. Bleikur október heldur áfram í Bústaðakirkju. Verið hjartanlega velkomin á hádegistónleika í Bústaðakirkju. 

Hjörleifur Valsson og Jónas Þórir héldu dásamlega hádegistónleika í Bústaðakirkju miðvikudaginn 15. október sl. Á dagskrá voru Bítlalög í klassískum búningi ásamt fleiri skemmtilegum lögum. Séra Sigríður Kristín Helgadóttir annaðist um kynningu og bæn í lok tónleikanna. Bleikur október heldur áfram í Bústaðakirkju. Verið hjartanlega velkomin.