Jólin og hátíðardagarnir eru tími fjölskyldunnar. Við tökum því undir hvatningu Samanhópsins og hvetjum fjölskyldur til að vera saman um áramótin. Minnum einnig á helgihaldið í Bústaðakirkju og Grensáskirkju á gamlárskvöld og nýársdag. Sjá nánar hér til hliðar. Gleðilega hátíð.
Jólaball Fossvogsprestakalls fór fram sunnudaginn 29. desember kl. 15. Dagskráin hófst á helgistund í Bústaðakirkju. Að helgistund lokinni var farið inn í safnaðarheimili þar sem gengið var í kringum jólatréð. Kaffi og smákökur voru í boði fyrir alla viðstadda. Fjölmenni var á jólaballinu og þökkum við öllum fyrir komuna. Verið hjartanlega velkomin í kirkju um áramótin.
Fulltrúar Bústaðakirkju og Kvenfélags Bústaðasóknar færðu endurhæfingarmiðstöðinni Ljósinu fjárstyrk í dag, að fjárhæð kr. 500.000.- Móttökurnar í Ljósinu voru ljúfar og hlýjar. Fjármagnið var gjafafé frá tónleikagestum í Bleikum október í Bústaðakirkju, ásamt framlagi Kvenfélags Bústaðasóknar. Við þökkum listafólkinu öllu, fræðimönnum sem og tónleikagestum og söfnuðinum öllum þátttökuna með okkur í Bleikum október í Bústaðakirkju.
