Ragnheiður Bjarnadóttir
Safnaðarheimili Grensáskirkju hefur nú verið endurbætt og lagfært. Aðstaðan er til fyrirmyndar og eru nú haldnar brúðkaupsveislur, afmæli og erfidrykkjur við hinar bestu aðstæður. Eldhúsið var endurnýjað frá grunni. Lagnir lagfærðar, innréttingar og tæki endurnýjaðar og borðbúnaðurinn er nýr. Það sama er að segja um húsgögnin í salnum sjálfum en þar eru borð og stólar nýir. Salernisaðstaðan var einnig endurnýjuð að fullu, með nýjum tækjum og innréttingum. Sjón og sögu ríkari. Verið hjartanlega velkomin að skoða aðstöðuna hjá okkur í Grensáskirkju.
Bogi Ágústsson var gestur dagsins í eldri borgarastarfinu í Bústaðakirkju, miðvikudaginn 18. nóvember sl. Bogi fjallaði í erindi sínu um tónlist Bítlanna, sögu og áhrif á heiminn og mannlífið. Bogi miðlaði í orðum sínum mikilli þekkingu á Bítlunum og mátti finna fyrir vinnubrögðum hins þaulreynda fréttamanns í umfjöllun hans og framsetningu. Bogi dró fram skemmtileg og áhugaverð atriði úr sögu Bítlanna og spilaði tóndæmi. Við þökkum Boga innilega fyrir skemmtilegt og áheyrilegt erindi og öllum fyrir þátttökuna. Verið hjartanlega velkomin til þátttöku í helgihaldi og dagskrá Bústaðakirkju.
Mánudaginn 9. nóvember sl. var haldinn fundur í Kvenfélagi Bústaðasóknar. Ísold Björk Karlsdóttir ráðgjafi hjá Kvennaathvarfinu var gestur kvöldsins og kynnti starfsemi Kvennaathvarfsins. Kvenfélag Bústaðasóknar styður starfsemi Kvennaathvarfsins með fjárframlögum nú í nóvember. Við þökkum Ísold Björk innilega fyrir komuna og biðjum kærleikans Guð að blessa starfsemi Kvennaathvarfsins. Kvennamessa fer fram í Bústaðakirkju 15. nóvember nk. og jólafundur kvenfélagsins verður svo 14. desember. Skráning á jólafundinn stendur yfir.