Sunnudaginn 23. apríl nk. kl. 11 fer fram stöðvamessa fyrir alla fjölskylduna í Grensáskirkju. Í stöðvamessu fá viðstaddir sérstakt tækifæri á að taka virkan þátt í helgihaldinu. Á stöðvunum þremur þennan sunnudaginn koma fyrir sítrónur og súkkulaði, vígt vatn, bænatré og bænabönd. Í stöðvamessu eru, líkt og í hefðbundinni guðsþjónustu, lesnir ritningarlestrar, sungnir sálmar og bæna beðið. Stöðvarnar eru síðan staðir þar sem allir viðstaddir fá að meðtaka boðskapinn og nærveru Guðs á sérstaklega áþreifanlegan máta. 

Kirkjuprakkarar og TTT (tíu til tólf ára) krakkahópar hafa verið starfandi í Grensáskirkju síðustu vikurnar. Í helgihaldi dagsins og í kaffinu á eftir verður sýnilegur afrakstur barnastarfsins, listaverk og fleira. 

Séra Eva Björk Valdimarsdóttir flytur hugleiðingu og leiðir stundina ásamt Sólveigu Franlínsdóttur æskulýðsfulltrúa og séra Þorvaldi Víðissyni. Kirkjukór Grensáskirkju syngur undir stjórn Ástu Haraldsdóttur kantórs og börn úr barnastarfinu taka virkan þátt.

Að lokinni stundinni í kirkjunni verður boðið til messukaffis og sýningar á verkum kirkjuprakkara og TTT barna. 

Aðalsafnaðarfundur Grensássóknar hefst síðan að lokinni stöðvamessu kl. 12:05.

Verið hjartanlega velkomin í Grensáskirkju.