Enginn skortur á Guðs orði

Það er svo sannarlega enginn skortur á Guðs orði í Grensáskirkju. Hér er mikið biblíusafn sem hefur verið gefið kirkjunni í gegnum árin. Biblíur á hinum ýmsu tungumálum í öllum stærðum og gerðum. 

Það er við hæfi að draga fram þetta ríkulega safn þessa vikuna, en sunnudaginn 4. febrúar er biblíudagurinn haldinn hátíðlega í kirkjum landsins.

Í Grensáskirkju er búið að leggja fram hinar ýmsu Biblíur á borð og eru þær til sýnis þessa vikuna til þess að fagna biblíudeginum. Þá verður sérstakelga fjallað um Biblíuna í fjölskyldu-stöðvamessu í Grensáskirkju sunnudaginn 4. febrúar kl. 11. 

Verið öll hjartanlega velkomin.

Biblíudagurinn er, eins og nafnið gefur til kynna, dagur sem er helgaður hinni helgu bók. 

Biblían er enn þann daginn í dag bókin sem er mest seld í heiminum öllum. Hún hefur verið þýdd á flest töluð tungumál samtímans og við viljum geta gengið að Guðs orði nánast hvar sem er í heiminum.

Hið íslenska biblíufélag (HÍB) hefur það erindi að varðveita orðið og dreifa því. Félagið er elsta starfandi félag landsins, en það var stofnað árið 1815.

Félagið gefur líka út fréttabréfið B+, en það má nálgast það í forsal Grensáskirkju.