Sumardagurinn fyrsti var haldinn hátíðlegur í Fossvoginum

Félagsauður mikill og samvinna góð

Sumardagurinn fyrsti var haldinn hátíðlegur í Fossvoginum fimmtudaginn 23. apríl sl.

Dagskráin hófst í Bústaðakirkju með opnun listasýningar leikskólabarna í anddyri kirkjunnar kl. 11:00.

Klukkan 11:30 hóf Skólahljómsveit Austurbæjar dagskrána í Bústaðakirkju með dásamlegum lúðraþyt og tónlist. Þá voru sungin nokkur sunnudagaskólalög. Stundina í kirkjunni leiddu séra Sigríður Kristín Helgadóttir, séra Þorvaldur Víðisson og Sólveig Reynisdóttir leiðtogi. Ásdís Magdalena Þorvaldsdóttir lék á flygil.

Hrólfur Svavarsson formaður nemendafélags Réttarholtsskóla flutti hátíðarræðu.

Félagar úr línudanshópi Hæðagarðs ætluðu að sýna listir sínar, en forföll urðu úr hópnum. Þau báðu fyrir sumarkveðjur.

Frá Bústaðakirkju var gengið í skrúðgöngu niður í Víkina. Skátafélagið Garðbúar leiddu gönguna ásamt Skólahljómsveit Austurbæjar og lögreglumönnum á bifhjólum. Í Víkinni buðu Víkingar upp á pylsur, andlitsmálun fyrir börnin og hoppukastala, og kaffi og veitingar fyrir eldri kynslóðina.

Dagskráin og framkvæmdin öll er birtingarmynd hins mikla félagsauðs sem finna má í Fossvoginum, þar sem skólar, leikskólar, félagasamtök, skátar, kirkjan, Knattspyrnufélagið Víkingur, Skólahljómsveit Austurbæjar, borgin, Bústaðir, Hæðagarður o.fl. leggja sitt að mörkum í skipulagningu og framkvæmd.

Við þökkum vel heppnaðan dag og óskum ykkur gleðilegs sumars.

Nokkrar myndir frá deginum má sjá hér fyrir neðan.