Kvöldmessa er notaleg stund, og heilög
Í Bústaðakirkju er boðið upp á kvöldmessur öll sunnudagskvöld í sumar kl. 20:00. Í kvöldmessunum er andrúmsloftið lágstemmt en heilagt. Ljúfar stundir með einsöng, hugleiðingu, bænagjörð og öllu því sem hefðbundnar guðsþjónustur skarta.
Nýbreytnin nú er hins vegar sú að í hverri kvöldmessu verður einsöngur.
Anna Sigríður Helgadóttir syngur einsöng
Félagar úr Kammerkór Bústaðakirkju annast um sönginn í kvöldmessunum í Bústaðakirkju í sumar. Kórfélagarnir skipta með sér sunnudögunum í sumar og koma fram eitt og eitt, við undirleik Jónasar Þóris organista. Anna Klara Georgsdóttir söngkona reið á vaðið sunnudaginn 4. júní, en nú er komið að Önnu Sigríði Helgadóttur, sem mun annast um tónlistina sunnudaginn 11. júní nk. kl. 20:00. Í upphafi mun Anna Sigríður leiða almennan safnaðarsöng og einnig í lokin. En öll önnur tónlist í kvöldmessunni verður einsöngur af hennar hendi.
Séra Eva Björk Valdimarsdóttir þjónar
Séra Eva Björk Valdimarsdóttir flytur hugvekju og leiðir stundina á sunnudagskvöldið ásamt messuþjónum.
Verið hjartanlega velkomin í kvöldmessu í Bústaðakirkju.