Á fyrsta sunnudegi í aðventu, 27. nóvember, höldum við afmælishátíð Bústaðakirkju, fyrst með fjölskylduguðsþjónustu kl. 11 og vöfflukaffi, og síðan aðventuhátíð kl. 17. Allir aldurshópar eru velkomnir í fjölskylduguðsþjónustuna - það er ekki guðsþjónusta kl. 13 á aðventunni. Við syngjum saman sunnudagaskólalögin og líka aðventusálmana. Meðal annars æfum við sálm um kertin á aðventukransinum sem er nýkominn inn í sálmabókina okkar og er eftir Herdísi Egilsdóttur.

Boðskapur aðventunnar er að Guð kemur til okkur og mætir okkur eins og við erum. Þeim boðskap miðlum við bæði með brúðuleik og stuttri hugvekju. Og svo höldum við upp á afmæli Bústaðakirkju með vöfflukaffi í boði sóknarnefndar Bústaðakirkju en kirkjan var vígð á fyrsta sunnudegi í aðventu árið 1971 og er því orðin 51s árs. Öll afmælisbörn sérstaklega velkomin! Síðdegis er svo vegleg aðventuhátíð með miklum söng og hátíðleik. Þar talar Víðir Reynisson sem okkur er að góðu kunnur. 

Í nýju sálmabókinni okkar er aðventusálmur eftir Herdísi Egilsdóttur, kennara, sem hún samdi árið 1997. Sálmurinn er sunginn við sama lag og kertasöngurinn sem við þekkjum flest og er eftir Lilju S. Kristjánsdóttur. Sálmur Herdísar fjallar á skýran hátt um heiti aðventukertanna og því ætlum við að nota hann á þessari aðventu í Fossvogsprestakalli. 

Sálmurinn er númer 8 í sálmabók þjóðkirkjunnar og er svona: 

1. Við kveikjum fyrsta kerti á.                                               

Það kennt við spádóm er

um fátækt barn í fjárhúskró

með frið í hjarta sér. 

2. Við kveikjum öðru kerti á.

Af kærleik fyllast menn.

Sitt nafn það ber af Betlehem,

þar barnið fæðist senn. 

3. Við kveikjum þriðja kerti á.

Það kennt er hirða við

sem gættu kinda´ um napra nótt

í nánd við fjárhúsið. 

4. Við kveikjum fjórða kerti á.

Nú komin eru jól

og englar syngja undurblítt

svo ómar heims um ból.