Aðventan undirbúin

Fyrsti sunnudagur í aðventu er núna á sunnudaginn. Nóg er um að vera í Fossvogsprestakalli á aðventunni og er því mikill undirbúningstími í gangi núna. Á sunnudaginn í Bústaðakirkju verður fjölskyldumessa og vöfflukaffi kl. 11 og aðventuhátíð kl. 17. Það var gaman að koma í kirkjuna í morgun og sjá allan undirbúninginn á hinum ýmsu sviðum. 

Starfsfólk Bústaðakirkju vann hörðum höndum við að gera kirkjuna jólalega fyrir aðventuna. Þar er jólatréið auðvitað ómissandi. Á myndinni má sjá Hólmfríði djákni og Boggu húsmóður setja upp tréð sem var skreytt með ljósum, silfruðum kúlum og auðvitað stjörnunni á toppnum. Stjarnan minnir okkur á Betlehemstjörnuna sem að vísaði vitringunum leiðina að fjárhúsinu, þar sem að frelsarinn var fæddur.

Ljúfir jólatónar fylgdu skreytingunum, en tónlistarfólk sem að mun spila á aðventuhátíðinni var mætt á æfingu. Jónas Þórir leiddi æfinguna á flyglinum. Hin ýmsu jólalög voru spiluð og skeggrædd. Svona tal og tónar gera aðventuundirbúninginn svo sannarlega hátíðlegan.

Aðventan er tími friðar og vonar. 

"Því barn er oss fætt, sonur er oss gefinn."

Verið velkomin í kirkju á aðventunni.