KSS og KSF

 

KSS, eða Kristileg skólasamtök, er félag fyrir ungt fólk á aldrinum 15-20 ára. Félagsmenn halda fundi á laugardagskvöldum kl. 20:30 að Holtavegi 28, húsi KFUM & KFUK, í Reykjavík. 
 
Á KSS fundum syngjum við saman, fáum uppbyggjandi og jafnframt skemmtilega fræðslu um kristna trú og kitlum hláturtaugarnar í góðra vina hópi. Eftir fundi er svo yfirleitt einhver skemmtileg dagskrá við allra hæfi. 
 
Félaginu er stjórnað af félagsmönnum sjálfum. Einu sinni á ári er kosið í fimm manna stjórn sem skipuleggur og ber ábyrgð á starfi félagsins. Einnig eru hinar ýmsu nefndir starfandi innan félagsins. Samfélagsnefnd sér um og skipuleggur dagskrána eftir fundi, árshátíðarnefnd heldur utan um hina stórglæsilegu árshátíð félagsins sem haldin er einu sinni á hverjum vetri, kynningarnefnd sér um öflugt kynningarátak félagsins í upphafi hvers vetrar og svona mætti lengi telja. 
 
Í KSS er að finna afar öflugt tónlistarlíf þar sem margir hafa stigið sín fyrstu skref á framabraut tónlistarinnar. Einnig er leikfélagið Platitude starfandi okkar á meðal. Fótboltamót eru haldin a.m.k. einu sinni á ári við mikinn fögnuð félagsmanna. Það ættu allir að geta fundið eitthvað við sitt hæfi innan félagsins í samfélagi við Guð og menn. 
 
Á haustin og vorin fara KSS-ingar saman í Vatnaskóg á svokölluð skólamót. Þetta eru helgarferðir sem samanstanda af miklu fjöri og fræðslu um kristna trú ásamt því að vera tækifæri til þess að kynnast betur innbyrðis. 
 
Það er tekið vel á móti öllum í KSS. Taktu skrefið! Við hlökkum til að sjá þig. 
Nánari upplýsingar um KSS má finna á heimasíðunni: http://www.ksh.is
 
KSF

Kristilegt stúdentafélag (KSF) var stofnað 1936 og starfar innan Þjóðkirkjunnar og Háskóla Íslands. KSF er einnig aðili að IFES (International Fellowship of Evangelical Students) sem eru alþjóðleg samtök kristilegra stúdentfélaga. Markmið félagsins er að sameina trúaða stúdenta og aðra á aldrinum 20-30 ára til þess að styrkja og glæða trúarlíf þeirra og boða fagnaðarerindið um Jesú Krist. Félagið er með fundi alla fimmtudaga kl. 20:30 í Kristniboðssalnum, Háaleitisbraut 58-60. Fundir KSF byggjast upp á lofgjörð í gegnum tónlist, bænastund og ræðu frá ræðumanni. Ræðurnar eru á bilinu 10-20 mín langar og fjalla ýmist um áhugaverð efni tengd kristinni trú eða trúarlega uppbyggingu. Eftir fundi er gjarnan spilað, farið í bíó, keyptur ís eða eitthvað annað skemmtilegt og uppbyggilegt. Nánari upplýsingar má finna á heimasíðunni ksh.is