Veðurspár þeirra gömlu

2013-04-29 17:00:00

 

Hér er smá hugleiðing um veðrið úr gömlu almanaki frá árinu 1897.

Gaman að sjá hvernig þeir gömlu spáðu í veðrið fyrir daga veðurspáa.

Ef vil vill getum við spáð í sumarið út frá þessum ljóðlínum.

 

VEÐURSPÁR ÞEIRRA GÖMLU.

Pálsmessa (25. janúar):

Heiðríkt veður og himinn klár

á helga Paulus messu,

mun það boða mjög gott ár;

marka´ég það af þessu.

En ef þokan Óðins kvon

á þeim degi byrgir

fénaðardauða og fellisvon

forsjáll bóndinn syrgir.

 

Febrúarmánuður:

Febris ef ei færir fjúk

frost né hörku neina,

kuldi sár þá kemur á búk,

karlmenn þetta reyna.

Ef þig fýsir gefa að gætur

gátum fyrri þjóða,

páskafrostið fölna lætur

Februari gróða.

 

Kyndilmessa (2. febrúar):

Ef í heiði sólin sést

á sjálfa kyndilmessu,

vænta snjóa máttu mest,

maður upp frá þessu.

 

Pétursmessa ( 22. febrúar):

Ef Pétur í feikn og frosti særir,

ferna tíu með sér færir,

vorið víst óvíða nærir,

verða sauðir ei frjóbærir.

 

Matthíasarmessa ( 24. febrúar, 25. febrúar í hlaupári=Hlaupársmessa):

Matthías þíðir oftast ís,-

er það greint í versum,-

annars kæla verður vís,

ef vana bregður þessum.

Matthías ef mjúkur er,

máttugt frost þá vorið ber,

vindur, hríð og veðrið hart

verður fram á sumar bjart.

 

Jónsmessa (24. júní):

Á Jónsmessu ef viðrar vott

við því flestir kvíða,

þá mun verða þeygi gott

að þurrka heyin víða.

 

Þingmaríumessa (2. júlí):

Hvelfi af skýjum höstugt regn

á helgum Maríudegi,

lengi síðan líður megn

loft í votum vegi.

Nema ef áður væta var,

varla skal upp halda,

því dagar og veður dyljast þar,

sem dýr vill Guð veraldar.

 

Marteinsmessa (11. nóvember):

Merteinsmessu merki ég þó

myrkvast nóttin langa,

ef fer þá koma frost með snjó,

frá ég það lengi ganga.

Þá ef hylur þyknið loft,

þíða, en frostið eigi,

veðradimmur verður oft

veturinn frá þeim degi.

Sé þá úti sólskin glatt

og sýnist frostum gegni,

Marteinn segir það merki hratt

meir af frosti´en regni.

 

Jól ( 24. desember):

Hátíð jóla hygg þú að,

hljóðar svo gamall texti,

ársins gróða þýðir það,

ef þá er tungl í vexti.

En ef máninn er þá skerður

önnur fylgir gáta;

árið nýja oftast verður

í harðasta máta.            J.Þ.