Ferming

 

Ferming er guðsþjónusta, þar sem skírður einstaklingur staðfestir með játningu sinni þá játningu, sem aðrir fóru með fyrir hans hönd á unga aldri. Fermingin fer fram, þegar viðkomandi barn hefur lokið fermingarundirbúningi og fræðslu fyrir athöfnina. 
Sérstök fermingarathöfn fer fram með þátttöku fermingarbarna, sem flytja bænir, lesa ritningartexta, og aðstoða e.t.v. við útdeilingu. Fermingarbörn eru klædd hvítum kirtlum og sitja í kór kirkjunnar. Tónlist og sálmar eru gjarnan valin úr æskulýðsstarfi kirkjunnar, lög sem fermingarbörnin þekkja. 
 
Þegar fermingarbarn er kallað upp að altari með fullu nafni til þess að staðfesta skírnina er það spurt; viltu leitast við, af fremsta megni, að hafa frelsarann Jesú Krist að leiðtoga lífsins. Fermingarbarn svarar játandi og krýpur síðan niður. Prestur leggur hönd á höfuð þess og segir; almáttur Guð þinn ástríki faðir, styrki þig og leiði að eilífu. Þá rís fermingarbarn upp og tekur í hönd prestsins og mælir ritningargreinina, sem fermingarbarnið hefur sjálft valið úr ritningunni. 
 
Altarisganga er hluti fermingarinnar og fer hún fram í fermingarmessunni. Fermingarbörn ganga til altaris með foreldrum og öðrum þeim ástvinum, sem óska að fylgja þeim til altaris. 
 
Fermingarbörnin hafa í fermingarfræðslunni lært að þekkja liði messunnar og merkingu þeirra auk almennrar fræðslu um kristna trú, siðfræði, samskipti kynjanna, ábyrgð okkar í sköpunarverkinu o. fl. í Fræðslunni er lögð mikil áhersla á upplifun. 
 
Fermingarbörn eru beðin að vera dugleg að sækja messur með fjölskyldum sínum og þau skulu mæta í messur ekki sjaldnar er 7 sinnum yfir veturinn. Í lok athafnar raða börnin sér upp til hópmyndatöku en beðið er um það að myndataka fari ekki fram í athöfninni sjálfri. 
 
 
Hér er safn af ritningarversum
Tilvalið fyrir fermingarbörn að skoða.
 

Ákalla mig á degi neyðarinnar, og ég mun frelsa þig, og þú skalt vegsama mig. Sálm.50:15

 

Allt megna ég fyrir hjálp hans, sem mig styrkan gjörir. Fil. 4:13

 

Allt sem þið viljið, að aðrir menn gjöri yður, það skuluð þér og þeim gjöra. Þetta er lögmálið og spámennirnir. Matt. 7:12

 

Biðjið, og yður mun gefast, leitið og þér munuð finna, knýið á og fyrir yður mun upp lokið verða. Matt. 7:7

 

Drottin er öllum góður, og miskunn hans er yfir öllum, sem hann skapar Sálm. 145:9

 

Drottinn er góður, miskunn hans varir að eilífu og trúfesti hans frá kyni til kyns. Sálm. 100:5

 

Drottinn er ljós mitt og fulltingi, hvern ætti ég að óttast? Drottinn er vígi lífs míns, hvern ætti ég að hræðast? Sálm. 27:1

 

Drottinn er minn hirðir, mig mun ekkert bresta. Sálm. 23:1

 

Drottinn er trúfastur í öllum orðum sínum og miskunnsamur í öllum verkum sínum. Sálm. 145:13b

 

Drottinn er vörður þinn, Drottinn skýlir þér, hann er þér til hægri handar. Sálm.121:5

 

Drottinn mun vernda þig fyrir öllu illu, hann mun vernda sál þína. Sálm. 121:7

 

Drottinn, þú ert minn Guð! Ég vil vegsama þig, lofa nafn þitt! Þú hefir framkvæmt furðuverk, löngu ráðin ráð, trúfesti og sannleika. Jes. 25:1

 

Ef Drottinn byggir ekki húsið, erfiða smiðirnir til ónýtis. Sálm. 107:1

 

Ef þér elskið mig, munuð þér halda boðorð mín.    Jóh. 14:15         

 

Ef vér játum syndir vorar, þá er hann trúr og réttlátur, svo að hann fyrirgefur oss syndirnar og hreinsar oss af öllu ranglæti.  1.Jóh. 1:9     

 

Ég er góði hirðirinn. Góði hirðirinn leggur líf sitt í sölurnar fyrir sauðina.  Jóh. 10:11

 

Ég hef Drottin ætíð fyrir augum, þegar hann er mér til hægri handar, skriðnar mér ekki fótur. Sálm. 16:8

 

Ég vil lofa Drottinn meðan lifi, lofsyngja Guði mínum, meðan ég er til. Sálm. 146:2

 

Ég vil lofa þig, Drottinn, af öllu hjarta, segja frá öllum þínum dásemdarverkum. Sálm. 9:2

 

Ég vil vegsama Drottin alla tíma, ætíð sé lof hans mér í munni. Sálm. 34:2

 

En þeir sögðu: "Trú þú á Drottin Jesú, og þú munt verða hólpinn og heimili þitt."                     Post. 16:31

 

Engill Drottins setur vörð kringum þá er óttast hann, og frelsar þá. Sálm. 34:8

 

Fel Drottni vegu þína og treyst honum, hann mun vel fyrir sjá. Sálm. 37:5

 

Gott mannorð er betra en mikill auður, vinsæld er betri en silfur og gull. Orðskv. 22:1

           

Guð er oss hæli og styrkur, örugg hjálp í nauðum. Sálm. 46:2

 

Guð fyrirgefur allar misgjörðir þínar, læknar öll þín mein. Sálm. 103:3

 

Hann veitir kraft hinum þreytta og gnógan styrk hinum þróttlausa. Jesaja 40:29

 

Hjálp mín kemur frá Drottni, skapara himins og jarðar. Sálm. 121:2

 

Hjarta yðar skelfist ekki. Trúið á Guð og trúið á mig. Jóh. 14:1

 

Í friði leggst ég til hvíldar og sofna, því að þú, Drottinn, lætur mig búa óhultan í náðum. Sálm. 4:9

 

Í þínar hendur fel ég anda minn, þú frelsar mig, Drottinn, þú trúfasti Guð! Sálm 31:6

 

Í upphafi var Orðið og Orðið var hjá Guði og Orðið var Guð. Jóh. 1:1

 

Jafnvel þótt ég fari um dimman dal, óttast ég ekkert illt, því að þú ert hjá mér, sproti þinn og stafur hugga mig. Sálm. 23:4

 

Jesús Kristur er í gær og í dag hinn sami og um aldir.   Heb. 13:8         

 

Jesús mælti: „Ég er upprisan og lífið. Sá sem trúir á mig, mun lifa, þótt hann deyi.” Jóh. 11:25

 

Jesús sagði: „Ég er ljós heimsins. Sá sem fylgir mér, mun ekki ganga í myrkri, heldur hafa ljós lífsins. Jóh 8:12

 

Jesús sagði: „Komið til mín, allir þér sem erfiði hafið og þungar byrðar, og ég mun veita yður hvíld.” Matt. 11:28

 

Jesús segir við hann: „Ég er vegurinn, sannleikurinn og lífið. Enginn kemur til föðurins, nema fyrir mig.” Jóh. 14:6

 

Kærleikurinn breiðir yfir allt, trúir öllu , vonar allt, umber allt. Kærleikurinn fellur aldrei úr gildi. I. Kor 13:7

 

Kenn mér að gjöra vilja þinn, því að þú ert minn Guð. Þinn góði andi leiði mig um slétta braut.  Sálm. 143:10             

 

Komið til mín, allir þér sem erfiði hafið og þungar byrðar, og ég mun neita yður hvíld. Matt. 11:28

 

Lát engan líta smáum augum á æsku þína, en ver fyrirmynd trúaðra, í orði, í hegðun, í kærleika, í trú, í hreinleika. I. Tim. 4:12

 

Leitið Drottins, meðan hann er að finna, kallið á hann meðan hann er nálægur! Jesaja 55:6

 

Lítið ekki á eigin hag, heldur einnig annarra. Verið með sama hugafari sem Jesús Kristur var. Fil. 2:4-5

 

Lofa þú Drottin, sála mín, og gleym eigi neinum velgjörðum hans. Sálm 103:2

 

Náð mín nægir þér, þó að mátturinn fullkomnast í veikleika. II. Kor. 12:9

 

Náðugur og miskunnsamur er Drottinn, þolinmóður og mjög gæskuríkur. Sálm. 145:8

 

Og hann sagði við alla: „Hver sem vill fylgja mér, afneiti sjálfum sér, taki kross sinn daglega og fylgi mér.” Lúk. 9:23

 

Orð krossins er heimska þeim er glatast, en oss, sem hólpnir verðum, er það kraftur Guðs. I. Kor 13:7

 

Óttast þú eigi, því að ég er með þér. Lát eigi hugfallast, því að ég er þinn Guð. Ég styrki þig, ég hjálpa þér, ég styð þig með hægri hendi réttlætis míns. Jes. 41:10

 

Sá sem ástundar réttlæti og kærleika, hann öðlast líf, réttlæti og heiður. Orðskv. 21:21

 

Sælir eru friðflytjendur, því að þeir munu Guðs börn kallaðir verða.    Matt. 5:9

 

Sælir eru hjartahreinir, því að þeir munu Guð sjá. Matt. 5:8

 

Sælir eru hógværir, því að þeir munu jörðina erfa. Matt. 5:5

 

Sælir eru miskunnsamir, því að þeim mun miskunnað verða.   Matt. 5:7   

 

Sælir eru þeir, sem hungrar og þyrstir eftir réttlætinu, því að þeir munu saddir verða. Matt 5:6                                

 

Skapa í mér hreint hjarta, ó Guð, og veit mér nýjan, stöðugan anda. Sálm. 51:12

 

Svo elskaði Guð heiminn, að hann gaf son sinn eingetinn til þess að hver sem á hann trúir glatist ekki, heldur hafi eilíft líf. Jóh 3:16

 

Þér eruð vinir mínir, ef þér gjörið það, sem ég býð yður.  Jóh. 15:14

           

Því að ég þekki þær fyrirætlanir, sem ég hefi í hyggju með yður - segir Drottinn - fyrirætlanir til heilla, en ekki til óhamingju, að veita yður vonarríka framtíð. Jer. 29:11

 

Því að ég, Drottinn, Guð þinn, held í hægri hönd þína og segi við þig: "Óttast þú eigi, ég hjálpa þér!"          Jesaja 41:13

 

Því að þín vegna býður hann út englum sínum til þess að gæta þín á öllum vegum þínum. Sálm. 91:11            

 

Þótt ég fari um dimman dal óttast ég ekkert illt því að þú ert hjá mér, sproti þinn og stafur hugga mig. Sálm. 23:4

 

Því svo elskaði Guð heiminn að hann gaf son sinn eingetinn, til þess að hver sem á hann trúir glatist ekki, heldur hafi eilíft líf. Jóh. 3:16   

 

Varðveit mig sem sjáaldur augans, fel mig í skugga vængja þinna. Sálm. 17:8

 

Varðveit mig, Guð, því að hjá þér leita ég hælis. Sálm. 16:1

 

Vér vitum, að þeim, sem Guð elska, samverkar allt til góðs, þeim sem kallaðir eru samkvæmt ákvörðun Guðs. Róm. 8:28

 

Vísa mér veg þinn, Drottinn, lát mig ganga í sannleika þínum, gef mér heilt hjarta, að ég tigni nafn þitt.  Sálm.86:11

 

Þitt orð er lampi fóta minna og ljós á vegum mínum. Sálm. 119:105