Messur klukkan 11 og 14

18.11.2018

Á sunnudaginn verður ekki barnastarf í Bústaðakirkju heldur sameiginleg fjölskyldumessa, Grensás- og Bústaðakirkju. Og verður hún  í Grensáskirkju kl 11:00

Bústaðakirkja og Grensáskirkja bjóða fjölskyldur af öllum gerðum velkomnar til guðsþjónustu í Grensáskirkju næstkomandi sunnudag, þann 18. nóvember, kl. 11 með þátttöku sunnudagaskólans úr Bústaðakirkju. Uppbyggjandi boðskapur og líflegur söngur í umsjá Daníels, Sóleyjar, Ástu organista, félaga í Kirkjukór Grensáskirkju,fermingarbarna vorsins og sr. Maríu. Barna- og stúlknakórar Bústaðakirkju syngja undir stjórn Svövu K. Ingólfsdóttur. Eitthvað gott að maula á eftir. Verið öll velkomin.

 

Guðsþjónusta kl. 14:00 í Bústaðakirkju.

sr. Kristján Björnsson vígslubiskup messar. Frímúrarakórinn syngur undir stjórn Jónasar Þóris. Messuþjónar aðstoða. Heitt á könnunni eftir messu. Allir velkomnir.

 

Lexía: Sef 3.14-17
Hrópaðu af gleði, Síonardóttir!
Fagnaðu hástöfum, Ísrael!
Þú skalt kætast og gleðjast af öllu hjarta,
dóttirin Jerúsalem.
Drottinn hefur ógilt refsidóminn yfir þér,
hann hefur hrakið fjendur þína á brott.
Konungur Ísraels, Drottinn, er með þér,
engar ófarir þarftu framar að óttast.
Á þeim degi verður sagt við Jerúsalem:
„Óttastu ekki, Síon,
láttu ekki hugfallast.
Drottinn, Guð þinn, er hjá þér,
hin frelsandi hetja.
Hann mun fagna og gleðjast yfir þér,
hann mun hrópa af fögnuði þín vegna eins og á hátíðisdegi
og hugga með kærleika sínum

 

 

Pistill: Heb 3.12-14
Gætið þess, bræður og systur, að hafa ekkert illt í hjarta og láta engar efasemdir bægja ykkur frá lifanda Guði. Uppörvið heldur hvert annað hvern dag á meðan enn heitir „í dag“, til þess að enginn forherðist af táli syndarinnar. Því að við erum orðin hluttakar Krists svo framarlega sem við treystum honum staðfastlega allt til enda eins og í upphafi.

 

 

Guðspjall: Matt 25.1-13
Enn sagði Jesús: „Þá er líkt um himnaríki og tíu meyjar sem fóru til móts við brúðgumann með lampa sína. Fimm þeirra voru fávísar en fimm hyggnar. Þær fávísu tóku lampa sína en höfðu ekki olíu með sér en hinar hyggnu tóku olíu með á könnum ásamt lömpum sínum. Nú dvaldist brúðgumanum og urðu þær allar syfjaðar og sofnuðu.
Um miðnætti kvað við hróp: Brúðguminn kemur, farið til móts við hann. Þá vöknuðu meyjarnar allar og tóku til lampa sína. En þær fávísu sögðu við þær hyggnu: Gefið oss af olíu yðar, það er að slokkna á lömpum vorum. Þær hyggnu svöruðu: Nei, hún nægir aldrei handa öllum. Farið heldur til kaupmanna og kaupið handa yður. Meðan þær voru að kaupa kom brúðguminn og þær sem viðbúnar voru gengu með honum inn til brúðkaupsins og dyrum var lokað.
Seinna komu hinar meyjarnar og sögðu: Herra, herra, ljúk upp fyrir oss. En hann svaraði: Sannlega segi ég yður, ég þekki yður ekki.
Vakið því, þér vitið ekki daginn né stundina.