Barnamessa kl. 11:00 og guðsþjónsuta kl. 14:00 með þátttöku Súgfirðinga

10.10.2013

Messur sunnudaginn 13. október

 

Barnamessa klukkan 11:00

Líflega og gefandi samvera fyrir alla fjölskylduna.

Fræðsla söngur og lofgjörð.

 

Guðsþjónusta kl. 14:00 með þátttöku Súgfirðinga.

Þetta er heimamessa með söng og þátttöku Súgfirðinga.

Tvær örsögur að vestan undir heitinu ég man, Guðríður Gyða Halldórsdóttir og Sturla Gunnar Eðvarðsson .

Feðginin Þóra og Þórður Jóhannesson syngja og spila og Siggeir Siggeirsson tekur lagið.

Guðrún Sigríður Sigurðardóttir og Halldór Atlason lesta ritningarlestra og bænir.

Anna Sigga  og Aðalheiður Þorsteinsdóttir kynna nýja sálma og stjórna almennum safnaðarsöng

Þetta er 20. sunnudagur eftir þrenningarhátíð og litur messuklæða er grænn.

Messuþjónar aðstoða og prestur er sr. Pálmi Matthíasson.

Molasopi og hressing eftir messu.

Allir hjartanlega velkomnir.

 

Fyrri ritningarlestur er úr Rutarbók 2. kafla versum  8 - 12

Þá sagði Bóas við Rut: „Taktu nú eftir, dóttir mín. Tíndu ekki kornöx á neinum öðrum akri og farðu ekki héðan heldur haltu þig að stúlkunum mínum. Hafðu augun á akrinum þar sem piltarnir eru að skera korn og gakktu á eftir þeim. Ég hef bannað vinnufólkinu að amast við þér. Ef þig þyrstir farðu þá að vatnskerunum og drekktu af þeim sem piltarnir hafa fyllt.“
Þá féll hún fram á ásjónu sína, laut til jarðar og sagði við hann:
„Hvers vegna sýnir þú mér þá góðvild að virða mig, útlendinginn, viðlits?“
Bóas svaraði: „Mér hefur verið sagt allt um það hvernig þér fórst við tengdamóður þína eftir dauða manns þíns, að þú yfirgafst föður þinn og móður og ættland þitt og fórst til þjóðar sem þú hafðir aldrei áður kynnst. Drottinn, Guð Ísraels, launi þér verk þitt til fullnustu fyrst að þú ert komin til að leita verndar undir vængjum hans.“

Þannig hljóðar hið heilaga orð

Síðari ritningarlestur er úr Flippíbréfi  2. kafla versum 12 – 18

Þess vegna, mín elskuðu, sem ætíð hafið verið hlýðin, vinnið nú að sáluhjálp ykkar með ugg og ótta eins og þegar ég var hjá ykkur, því fremur nú þegar ég er fjarri. Því að það er Guð sem verkar í ykkur bæði að vilja og að framkvæma sér til velþóknunar.
Gerið allt án þess að mögla og hika til þess að þið verðið óaðfinnanleg og hrein, flekklaus Guðs börn meðal rangsnúinnar og gerspilltrar kynslóðar sem þið skínið hjá eins og ljós í heiminum. Haldið fast við orð lífsins mér til hróss á degi Krists. Þá hef ég ekki hlaupið til einskis né erfiðað til ónýtis.
Enda þótt blóði mínu verði úthellt við fórnarþjónustu mína þegar ég ber trú ykkar fram fyrir Guð, þá gleðst ég og samgleðst ykkur öllum. Af hinu sama skuluð þið einnig gleðjast og samgleðjast mér.

Þannig hljóðar hið heilaga orð

 

Guðspjall dagsins er úr Matteusi 21. kafla versum 28-32

Jesús sagði: „Hvað virðist ykkur? Maður nokkur átti tvo syni. Hann gekk til hins fyrra og sagði: Sonur minn, far þú og vinn í dag í víngarði mínum. Hann svaraði: Það vil ég ekki. En eftir á sá hann sig um hönd og fór. Þá gekk hann til hins síðara og mælti á sömu leið. Hann svaraði: Já, herra, en fór hvergi. Hvor þeirra gerði vilja föðurins?“
Þeir svara: „Sá fyrri.“
Þá mælti Jesús: „Sannlega segi ég ykkur: Tollheimtumenn og skækjur verða á undan ykkur inn í Guðs ríki. Því að Jóhannes kom til ykkar og vísaði ykkur á réttan veg og þið trúðuð honum ekki en tollheimtumenn og skækjur trúðu honum. Það sáuð þið en tókuð samt ekki sinnaskiptum og trúðuð honum.“

Þannig hljóðar hið heilaga guðspjall